Goizean goizetik, eguraldiak lagundu ez arren festa giroa nagusi izan da. 08:00etatik aurrera suak piztu, eta arkumeak erretzen hasi dira. Gaur egun burruntziarekin lan egiteko ohitura gehiena Gipuzkoan eta Bizkaian dago. Hauek izan dira parte hartzaileak: Joxe Angel Arriola. Lorenzo Ziarsolo, Eladio Perez, Unai Irazola, Urko Garate, Juan Bautista Etxabe, Mikel Erkizia, Joxean Lasa eta Juantxo Prieto.
Guztien artetik, txapela jantzi duena, Juan Bautista Etxaberen arkumea izan da saritua. Saria lortzearekin "poz handi bat" sentitu duela adierazi du. Sekretua ezin dela esan adierazi du irribarretsu, eta pazientzia dela gakoetako bat gaineratu du.
Bakoitzak hiruzpalau arkume erre ditu, ondoren jendearen artean pintxoak banatzeko. Arkume guztien artetik ia 1000 pintxo banatu dituzte, edariarekin lagunduta. Herritarrei saldutako pintxoekin bildutako irabaziak Etiopia-Utopia elkartera bideratuko dituzte, Wukro izeneko herrian errekak bideratu eta hango nekazaritza-bizitzari laguntzeko.