Euskal Herriko 15 mintegik jarri dituzte euren postuak Trianguloa plazan. Landare ekologikoek eta bonsaiek tartea izan dute, baina baita larunbatero kalean izaten diren mintegiek ere. Mintegi horietako bateko kide da Ramon Urkizu, eta berak azaldu digunez goiza ez da espero bezain ondo joan, eguraldiak jendea "atzeratu" egin duela uste du. Eurek basoko eta frutarako zuhaitzak saltzen badituzte ere, azokan gehien fruta arbolak saltzen direla adierazi digu; batez ere sagarrak.
Plaza euriak atseden emandakoan gehixeago betetzen bazen ere, euria izan da nagusi gaurko azokan eta aterkiak aterata ibili behar izan dute bertako lore eta landareak ikustera edo erostera gerturatu behar izan dutenek.