Igandera arte bidali ahal izango dira inauterietako lehiaketarako argazkiak

Bukatu da sei eguneko festa, eta orain Ostegun Gizenetik hasi eta Asteartita bitarteko egunak argazki eta bideoetan ikusiz gogoratzea geratzen da. Momentu onak edota ez hain onak, festa edo aje egunak, mozorroak, koloreak,... argazkitan jaso nahi ditu TOLOSALDEKO ATARIA-k

Nork ez du argazkiren bat atera inauterietan? Gaur egun, oso ohikoa da argazkiak ateratzea, eta guk argazki ikusgarri horiek jaso nahi ditugu lehiaketan. Inauterietan argazki kamarari eragin eta TOLOSALDEKO ATARIA-ra bidaltzeak saria izango du. Beste urte batez, Inauterietako argazki lehiaketa martxan baita.

Hasi ateratako argazkien artetik onena edota bitxiena aukeratzen eta bidali lehiaketara. Parte hartzaileek igandera bitarte izango dute euren irudiak argazkiak@ataria.info helbidera bidaltzeko aukera. Izen-abizenak, herria eta izenburua edo azalpen txikia gehitu beharko zaizkio argazkiari. 300ppp bereizmena eta 30 zentimetroko zabalera izan beharko du gutxienez argazkiak.

Parte hartzaile bakoitzak argazki bat bidaltzeko aukera izango du. Epaimahaiak lehiaketara iristen diren argazki guztien artetik bi onenak aukeratuko ditu, eta martxoaren 6ko aldizkarian argitaratuz emango dira jakitera bi argazki sarituak, saridunen izenak emango ditu argitara.

Argazki onenak, hau da, irabazleak, Zumaiako Zelai Talasoterapian bi lagunentzako sasoian jartzeko zirkuitu berezia jasoko du sari gisa. Bigarrenak, berriz, Tolosako Eguzkitza sagardotegian bi lagunentzako afaria lortuko du.