Eskualdeko 480 dantzari txikik inauteriari dei egin diote, Zaldunita bezperan. Euskal Herri osoko inauterien kolorea herri bakar batean bilduz, Trianguloa plazatik bi kalejira irten dira, Tolosako Alde Zaharrera eta erdialdera.
Zeru urdinek, ordea, atzo esan zieten agur tolosarrei, eta euriak azkartu egin ditu dantzari hasiberrien pausoak, aterpera joateko. Euskal Herria plazako txoznagunea izan dute gerizpe, eta Udaberriko fanfarrearen soinura dantzatu dituzte Txulalai, Altsasuko Momotxorroen dantza, Lantzeko inauterietako doinuak nahiz hainbat kalejira.
Egindako lanaren sari, eta gorputza berotzeko, hamaiketakoa eginda itzuli dira etxera.
