Bigarren itzulia aurrera doa, eta asteburuan Euskal Ligako Tolosak hamaseigarren jardunaldia jokatuko du, etxean. Partida garrantzitsua izango da, jokoan egongo diren hiru puntuak beharrezkoak baititu talde urdinak beheko postuetatik ihes egiteko. Baina horrez gain, aurkaria azken aurreko postuan dagoela kontuan hartuta, garrantzi bikoitza hartzen du lehiak, eurekiko aldea handitzeak lasaitasuna emango baitio Tolosa CF taldeari.
Aurreko asteburuan, Lantaronen etxean garaipen handia lortu zuten tolosarrek. Marco entrenatzaileak ongi azaltzen duen bezala Aulkitik atalean.
Harrobiko taldeak
Jubeniletan, txapeldunen fasea jokatzen ari dira tolosarrak, eta aurkari sendo bati 2-1 irabazi zioten. Partida gogorra izan zen, eta maldan gora segidan jarri zen. Lehen zatian Tolosaren atezainak mina hartu zuen, eta zelaiko jokalari bat jarri zuten atepean. Hurrengo jokaldian etorri zen kanpokoen gola. Bigarren zatian, partidari buelta emateko gogoz atera ziren urdinak, eta Ugartemendia eta Garmendiaren golekin lortu zuten helburua.
Kadeteek ere partida gogorra zuten etxean, eta aurretik jarri baziren ere, ezin izan zuten irabazi, bigarren zatian lortu baitzuten berdinketa Urnietakoek. Kanpokoek euren gola sartu aurretik, etxekoek hiru aukera garbi izan zituzten baina ezin. Ondoren, ere aukerak izan zituzten, baina berriro ezin. Infantilei dagokienez, bi garaipen eta guztira 17 gol. Marka ederra Tolosako txikiena.
Azkenik, Nerea Murua, Alazne Garmendiak, Mar Luzuriagak, Ainhoa Beldarrainek eta Ainhoa Bengoetxeak Realarekin teknifikazio entrenamenduak egingo dituzte. Ainhoa Garikano berriz, Euskal Selekzioaren deialdian sartu da, 16 urte azpikoan.