Urteroko moduan, gabonen atariko azoka berezia izan da Tolosan. Jaietarako azken erosketak egiteko eguna izaten da askorentzat, eta goizpasa egiteko aitzakia ederra beste hainbatentzat. Arrazoi bat edo beste, jendetza erakarri du hitzorduak Tolosara.
Larunbatero Zerkausian izaten diren postuekin batera, ia edozein produktu eskuratzeko aukera izan da gaur, San Frantzisko pasealekutik bertatik hasita. Gozo eta hestebeteak izan dira bertan, eta baita artisauen lan finenak ere. Trianguloa plazan askotariko ekoizleen produktuek bete dituzte postuak, gizarte eragileen txistorra postuekin batera. San Blas elkarteak antolatutako odolki lehiaketa izan da, hala ere, arreta gehien piztu duena.
Luis Mari Garikano tolosarrak bigarren aldiz jarraian irabazi du odolkirik onenaren garaikurra, eta Tolosako odolkirik onenarena ere berak jaso du, noski.
Erosketak alde batera utzita, haur eta gaztetxo guztiek Plaza Zaharrean egin nahi izan dute geldialditxoa, urteroko moduan. Hainbat animalia eta abere ikusgai zeuden bertan, eta txikienen begirada eta laztanak jaso dituzte oilo, ahuntz, txerri nahiz astoek.