"Biolentzia da genero arteko desberdintasunaren adierazle handiena, baina egunerokoa mikromatxismo handia dago, eta betaurreko kritiko horiekin begiratu behar diogu, beti, gizarteari". Halaxe azpimarratu nahi izan zuen, Ibai Iriarte Tolosako alkateak, azaroaren 25a egun isolatu ez bilakatzeko argudioa. Udaletxeko pleno aretoan aurkeztu zuen, Bilgune Feministako kide Eider Olazar Elduaien, Berdintasun Teknikari Agurtza Zubero eta Udaberri dantza taldeko kideekin batera, genero indarkeriaren aurkako egunaren inguruan antolatutako egitaraua.
Besteak beste, "salaketa horretarako indarrak batu eta elkarlana sustatu" behar dela azaldu zuen Iriartek eta, horren harira, datorren astearteko osoko bilkuran Tolosako udalbatzak onartuko duen adierazpen instituzionala izan zuen hizpide: "Osoko bilkura baino lehen, eta aurreko plenoa onartu bezala, elkarretaratzea izango da, eta herritar guztiei dei egiten diegu, 19:00etan Plaza Zaharrera bertaratzeko".
Bide beretik, Agurtza Zuberok Berdintasunaren udal protokoloa ostegunean bertan sinatuko dutela ere azpimarratu zuen, eragile gehiago bildu nahi izan dituztela azalduz. Halaber, egitaraua azaltzearekin batera, Beldur Barik proiektuan Tolosako gaztetxoek izango duten parte hartzeaz ere aritu zen; bi bideo izango dira lehian, genero indarkeria gaitzat hartuta.
Azkenik, Bilgune Feministaren izenean, Eider Olazarrek emakumeenganako indarkeriaren errealitatea "sistema oso batek bultzatua" dela nabarmendu zuen: "Oso eremu desberdinetatik bultzatzen da, gainera, indarkeria feminista". Horren aurrean, bihar, 13:00ean, Trianguloa plazatik abiatuko den manifestazioan makinaria guztia "lehertu" egin nahi dute, erasoen aurrean: "Ez gara biktimak edo subjektu pasiboak, eta ez da nahikoa erantzunak artikulatzearekin: alternatiba oso bat eraiki behar da".
