Karrozen zarata nahiz Ferialekuaren erabilera okerra Tolosako inauterietako arazo nagusi bilakatu dira azken urteotan. Horiek guztiak konpontzeko, inauteri mahaia osatu nahi du udalak.
Inauterietako eragile guztiak bildu nahi dituzte mahaian: karrozetako kuadrillak, aisialdi taldeak, txarangak, herritarrak... Horrela, lehen bilera bihar bertan izango da, 19:00etan, kultur etxean, mahaia osatu eta azalpen orokorrak emateko. Azaroaren 12an beste bilera bat egingo dute, leku eta ordu berean, proposamen zehatzak aztertzeko; azken bilkura, berriz, ordu eta leku berean izango da, azaroaren 26an, erabakiak hartzeko.