Badoa. Badoa pixkanaka goruntz Tolosa Eskubaloi taldea. Badoa bere bertsio onenerantz. Usurbili gailendu zitzaion bosgarren jardunaldian, eta hirugarren garaipena du jarraian. «Pixkana presioa gainetik kentzen hasiak gara» azaldu zion ATARIAri Ioritz Goikoetxea jokalariak larunbateko partida amaitu bezain laster.
Tolosarrek hasieratik bukaerara dominatu zuten neurketa. Soilik birritan izan zen atzetik markagailuan, 8-9 eta 9-10ekoan. Lehen ordu erdian txukun aritu ziren Noguesen mutilak, eta hiru goleko errentarekin joan ziren aldageletara, 15-12koarekin, hain zuzen.
Bigarren zatian, ordea, estutu egin zuten usurbildarrek. Hamar minutu faltan gol bakarrera jarri ziren, Tolosako bi jokalarik bi minutuko zigorra jaso eta gero. Baina Urtzi ongi ibili zen atepean, hainbat jokaldi deuseztatu zituen taldea okerren zen unean.
Kantxan berdintasuna nagusi zenean berriz, pixkanaka aldea zabaltzen joan ziren urdinak, sei goleko errentaz irabazten amaitzeko. Azkenean, 28-23.
Une honetan seigarren postuan da Tolosa, zazpi punturekin, lehenengoarengandik hiru puntura. Asteburuan aukera polita izango du gora egiteko, Anaitasuna eta Pulpok elkarren aurka jokatuko baitute. Tolosarrek, Elgoibarren jokatuko dute larunbatean, 19:30ean, Olaizaga kiroldegian.
Tolosa Eskubaloiak 28-23 irabazi dio Usurbili joko ona erakutsiz. Ikusi partidako irudirik onenak.
Ez diogu hau kapritxo hutsagatik: lagundu iezaguzu. Eduki hau guztia doan ikusten duzu ez dugulako irudikatzen euskarazko hitzik gabeko Tolosalderik. Atarikide, iragarle eta erakunde askoren laguntzarik gabe ezinezkoa litzateke. Zenbat eta komunitate handiagoa sortu, orduan eta sendoagoa izango da ATARIA: zurekin, zuekin. Ez utzi biharko gaur egin dezakezuna: egin zaitez Atarikide!
EGIN ATARIKIDE!