Iaz ere saiakera bat egin zuten kaleko zikin mota hori gutxitze aldera, txakurren erroldan izena emana duten tolosar guztiei bando bat bidaliz. Besteak beste, animaliak izan eta erabiltzeko udal arautegia zuen hizpide bando hark eta, arautegi horrek dioen moduan, jabeak animaliek kaka erretiratzera behartuta daudela gogorarazi nahi izan zieten herritar horiei.
Aurten saiakera horretan indar gehiago jarriz, 15 edukiontzi inguru ezarriko ditu, Tolosako Udalak, txakurren kakak biltzeko; hondakinen bilketa sistema berriaren abiada erabiliko dute horretarako.
www.tolosa.eus atarian edukiontzien kokalekuen proposamen bat zintzilikatu dute, mapa batean, 30 kokaleku posible marraztuz. Txakurren jabeek, orain, beren beharretara gehien egokitzen diren kokalekuak aukeratu beharko dituzte, bozkatuz. Modu horretan, beharrak ezagutzeaz gain, txakur kaken bilketa ere hobetzea da udalaren helbururik behinena.
Horrenbestez, urriaren 26ra bitarteko epea izango dute bozkatzeko, eta Tolosako Udalak herritar guztiei dei egin die elkarlan horretarako, bereziki animalien jabeak gonbidatuz.
Tolosako txakurren erroldaren arabera, 1.600 txakur daude herrian. Horren harira, udalak kezka azaldu du azkenaldian berdegune, kale eta parkeetan txakurren kaka eta pixa askotan izaten delako.
Ez diogu hau kapritxo hutsagatik: lagundu iezaguzu. Eduki hau guztia doan ikusten duzu ez dugulako irudikatzen euskarazko hitzik gabeko Tolosalderik. Atarikide, iragarle eta erakunde askoren laguntzarik gabe ezinezkoa litzateke. Zenbat eta komunitate handiagoa sortu, orduan eta sendoagoa izango da ATARIA: zurekin, zuekin. Ez utzi biharko gaur egin dezakezuna: egin zaitez Atarikide!
EGIN ATARIKIDE!