Musiherria jaia lehenengoz antolatu dute gaur, Tolosako herri-musikari guztien eskutik eta omenez. Goizean goizetik hasi dira, Tolosako hainbat auzotan dianak eginez eta, eguerdiko giroari begira, Alde Zahar ingurura jaitsi dira dultzainero, txaranga, banda nahiz orkestrak.
Bazkalorduan, berriz, Alondegian plazan herri-bazkaria izan da, aspaldiko jendetsuenetakoa: 500 pertsona inguru elkartu dira mahaiaren bueltan. Eta ez da gutxiagorako, Oier Iribarrenen eta Stop Sanfilipporen aldekoa izan baita egitasmoa. Arratsaldean Jainekin txarangak girotuko ditu kaleak eta gauean, berriz, Tximeleta eta La Jodederaren emanaldiak izango dira, Plaza Berrian.
