TARGAZKIk, Tolosaldeko Argazkilari Elkarteak, lehendabizikoz, “TOLOSA HERRIA” ARGAZKI LEHIAKETA antolatu du Tolosan argazki kultura areagotzeko asmoz eta era berean, Tolosaren izenak oihartzuna izan dezan argazki munduan. Lehiaketa San Joan Jaien egitarauaren barruan kokatuta dago.
Lehen edizio honetan, bai gaia eta bai parte hartzea libreak dira, edozeinek aurkez dezake bere lana, argazkilari profesionalak zein amateurrak, hemen jaioak zein atzerrian. Lanak digitalean bidaliko dira aurkezte kosturik gabe eta epea maiatzaren 31n bukatuko da.
Oinarriak TARGAZKIren web orrian aurkituko dituzue: www.targazki.com
Epaimahaikideak argazki munduan adituak dira eta epaia publikoa izango da ekainaren 7an 09:30ean Tolosako Kultur etxeko areto nagusian. Sari banaketa, ekainaren 21ean izango da Tolosako Kasinoan. Aldi berean, lehiaketan hoberen puntuatutako argazkien erakusketa inauguratuko da, baita TARGAZKIkideon beste erakusketa bat ere.