Hitzarmena sinatu berri dute Tolosako Udalak eta Udaberri Dantza Taldeak, 20 urterako lokala uzteari begira.
57 urteko ibilbidea du taldeak eta Ibai Iriarte alkateak taaldearen ibilbidea azpimarratu nahi izan du agerraldian, lokala uztea horren errekonozimendutzat joz: "Lan izugarria egiten dute Tolosan euskal kultura eta folklorea sustatuz eta harrobia ere lantzen dute, ehunka umeri dantzak irakatsiz".
Horrela, dantza taldeak opari moduan hartu du Igaralde kaleko lokala, "oso pozik". Udalaren ustez leku oso egokia da taldearentzat, etxebizitzarik gainean ez duelako; gainera, erabilera komertzialik ere ezin zaio eman, dotazionala delako. Udaberri lokala egokitzen ari da orain, langileen jarduna auzolanarekin uztartuz, eta datozen hilabeteotan egokituko dute guztia haien jantzi, dokumetu eta material-hondarea biltzeko.