Tolosaldeko ibilbide sarea plazaratzeko helburuz, BTT proba izango da igandean, Tolosaldea Garatzen agentziak antolatuta. Horren harira, gainera, BTT zentro berriaren inaugurazioa ere egingo dute etzi, ostiralarekin.
BTT probako izen-ematea 08:00etan irekiko dute igandean, Usabal kiroldegian eta probari, berriz, 09:00etan ekingo diote.
Parte-hartzaile bakoitzak BTT ibilbideen mapa bat jasoko du eta mapa horretan zenbait kontrol-puntu markatuta izango dira, ibilbideen sarean sakabanatuta. Probaren helburua hiru orduko denbora tartean ahalik eta kontrol-puntu gehien pasatzea izango da, eta horrek emango die puntuazio altuena kirolariei.
Parte-hartzaileek nahi duten moduan antolatu ahal izango dute ibilbidea, eta 12:00etatik aurrera, 10 minuturo penalizazioak ezarriko dizkiete azken emaitzari begira.
Tolosako BTT proba Usabal kiroldegian hasi eta bukatuko da, eta parte-hartzaileek 16 urte izan beharko dituzte, gutxienez. Izen-ematea doakoa izango da, gainera. Sari banaketa 13:00etan egingo dute.
Horrekin batera, BTT zentroa inauguratuko dute, ostiral honetan, Tolosan
ATARIA ez da soilik komunikabide bat: komunitate baten ahotsa da, eta urte hauen guztien ondoren, zuen babesa behar dugu, inoiz baino gehiago: ATARIAk behar du Tolosaldea. Horregatik erronka bat daukagu esku artean: gure eskualdeko 28 herrietan hamarna harpidedun berri behar ditugu. Zu falta zara, bazatoz?
EGIN ATARIKIDE!