Azken gobernu batzarrean hainbat erabaki hartu zituen udalak. Batetik, neguko kultura programaziora 38.936 euro bideratzea adostu zuten.
Era berean, Zuloaga Txikiko aterpea orain artekoak, Iñaki Etxeberria Insaustik, ustiatuko du 2019ko martxoaren 31a arte.
Bestalde, Tolomendiri 1.232,40 euroko diru laguntza emango diote azokak elkarrekin kudeatzeko hartutako konpromisoari jarraiki. Babarrun kofradiari bere aldetik, 2.140 euro emango dizkiote.
Kilometroak 2013ri dagokionez, 11.212,11 euroko diru laguntza emango diote, eta gainontzeko kopurua, 15.000 euro artekoa, aretoen ordainketan erabili zela gogoratu zuten. Bukatzeko, Tokiko Ekintza Planaren eguneratzea ere egin zuten. Honen arabera, Ekintza Planean kontuan hartu gabeko ekintzak identifikatuko dituzte, birformulatu daitezkeen ekintzak identifikatuko dituzte, eta bikoitzutako ekintzak ere identifikatuko dituzte.