Ataria ere bertan izan zen, eta Pablo Malo zuzendariak azaldu zuenez Joxean Lasaren eta Joxi Zabalaren famliekin maiz bildu da grabaketekin hasi aurretik. "Familiak hasieratik esan zigun oso lausengatuta sentitzen zirela beraien inguruan film bat egiteagatik. Gertatu zena kontatzeko esan zidaten".
Halaber, familiek bi sentimendu kontrajarri izan dutela esan zuen: "Batetik euren historia kontatu eta oroitzeko nahia dago, eta bestetik, oroitzapen horiek guztiak gogoratzeak sortzen duen tristura eta mina».
Filmaren inguruan, berriz, zuzendari donostiarrak esan zuenez, ez da dokumentala, fikzioa baizik, eta horregatik, "ikusiko dena ez da gertatu zenaren errealitatea". Malok esan zuen dokumentazio nahikoa badagoela jakiteko gutxi gorabehera nola gertatu zen guztia, eta horregatik, fidel izan asmo dutela gertatu zenarekin, baina, era berean, "familiarekiko distantzia eta errespetua mantenduz, eta biolentziaren pornografia egin gabe".