Tolosako Larramendi auzoan, Voith-Gorostidi eremuko urbanizazio lanak amaitzear dira, eta abenduan bertan hasiko dituzte, Arriarango gasolindegi alboko biribilgunea egiteko lanak.
Tolosako hirigintzako udal plangintzako puntuetako bat da biribilgunearena, eta pasa den uztailan hitzarmena sinatu zuten Tolosako Udalak eta Gipuzkoako Foru aldundiak, finantziazio akordioa zehazteko. Joan den ostiralean, berriz, Tolosako udal gobernuak baldintza pleguak onartu zituen, eta orain, proiektua gauzatzeko interesa duten enpresek beren proposamenak aurkeztu beharko dituzte; 13 egun izango dituzte horretarako.
Biribilgunearen lanak bukatzen direnean, eremu horretako segurtasuna hobetuko da, besteak beste, udalaren esanetan: «N-1ean Donostiatik Tolosara datozen ibilgailuek abiadura nabarmen murriztuko dute, eta gurutzabideak saihestu egingo dira.
Trafiko kontuez gain, aurrera begirako beste hainbat proiektuei bidea erraztuko die biribilguneak, Larramendi eta Belate elkartuko lituzkeen Oria gaineko zubia kasu. Horrez gain, Autobia Irla izeneko industri eremua garatzen denerako ere sarbidea egokituko du biribilguneak, eta azkenik, Uzturre kalea bi noranzkotan jartzea ere ahalbidetuko du.
Lan hauek Gipuzkoako Foru Aldundiak, Isla Autobiako enpresak eta Larramendi-Voith eremuko urbanizazioak finantzatuko ditu.
Pleguak onartuta, enpresek hamahiru egun dituzte, orain, proposamenak aurkezteko
Ez diogu hau kapritxo hutsagatik: lagundu iezaguzu. Eduki hau guztia doan ikusten duzu ez dugulako irudikatzen euskarazko hitzik gabeko Tolosalderik. Atarikide, iragarle eta erakunde askoren laguntzarik gabe ezinezkoa litzateke. Zenbat eta komunitate handiagoa sortu, orduan eta sendoagoa izango da ATARIA: zurekin, zuekin. Ez utzi biharko gaur egin dezakezuna: egin zaitez Atarikide!
EGIN ATARIKIDE!