Eguerdian aurkeztu dute 30. Titirijai, eta aurten, joan-etorriko txotxongiloak omenduko dituzte; hegoamerikar txotxongilo konpainiak izango dira, datorren azaroaren 24tik abenduaren 2ra bitarte, jaialdiko konpainia gonbidatuak.
Tolosako Ekinbide Etxeko Ana Arretxek, urtemuga honen alde pozgarri eta grisak izan ditu hizpide. Batetik, "Titirijai belaunaldiz belaunaldi transmititzen" den zerbait dela azpimarratu du: "Oso pozgarria da lehen, haurrak zirela, ikusle moduan etortzen zirenak, orain beren seme-alabekin ere bertaratzen direla ikustea".
Bestalde, ordea, murrizketa "izugarriak" egin behar izan ditu TEEk jaialdia aurrera ateratzeko: "Orain arte, 20 edo 25 konpainia inguruk parte hartu izan dute, eta aurten 12 soilik etorriko dira". Bestalde, Aranburu jauregiko erakusketarik ez da izango 30. Titirijain, eta helduentzako nahiz haur txikienentzako saioak ere antolatu ezinik geratu dira.
Hala eta guztiz ere, TEEko arduradunek, Kutxako babesleek nahiz Tolosako alkate Ibai Iriartek, kulturaren garrantziari begiratu diote agerraldian, behin eta berriz, TEEk eta Topic-ek, Titirijairen bidez egiten duen lanak, "bizikidetza, harremanak eta hazkuntza artistikoa sustatzen" duela nabarmenduz.