Ukrainiako Credo ganbera abesbatzak, irabaz zitzakeen sari guztiak irabazi ditu 44. Tolosako Abesbatza Lehiaketan; horien artean, Kutxa Sari Nagusia ere eskuratu dute, eta ondorioz, Arezzon (Italia) ospatuko duten Europako Abesbatzen Sari Nagusian, Tolosa ordezkatuko dute.
Atzo banatu zituzten sariak, Leidor aretoa erabat bete zuen amaierako kontzertuan. Sail bakoitzeko lehen hiru sailkatuek berriro abestu zituzten obrarik kuttunenak, eta txaloak eta publikoaren laudorioak nabarmenak izan ziren.
Horrela beraz, Credo abesbatzak jaso zituen txalo zaparradarik handienak, lau sari eskuratu baitzituzten. Batetik Lorenzo Ondarraren Pater Noster obra behartua hobekien interpretatu zuen taldea izan zen, epaimahaiaren ustez, eta Eusko Jaurlaritzaren saria jaso zuten. Halaber, ahots nahasien polifonia sailean nahiz ahots nahasien folklore sailean ere, irabazle suertatu zen abesbatza ukrainiarra. Azkenik, lehiaketako emanaldi guztiak kontuan hartuta, puntuaziorik altuena eskuratu duen abesbatza Credo bera izan denez, Kutxa Sari Nagusia irabazi zuten. 2013an, Italiako Arezzo hirian ospatuko duten Europako Abesbatzen Sari Nagusian parte hartzeko txartela eskuratu dute modu honetara.
Ukrainiarrekin batera, honako abesbatzak ere sarituak izan ziren: New Dublin Voices (Irlanda), Mikrokosmos (Frantzia), University os the Visayas Chorale (Filipinak), Latvian Voices (Letonia), Ensemble Quartonal (Alemania), Daarler Vocal Consort (Alemania) eta The Rose Ensemble (AEB).