Martin Garitano Diputatu Nagusia Tolosan izan zen atzo, Gipuzkoako Foru Aldundiak duela aste batzuk abiarazi zuen Herritarrekin egitasmoaren barruan. Helburu nagusia, "politika egiteko beste eredu bat martxan jartzea" dela nabarmendu zuen Garitanok.
Kultur Etxeko areto nagusia bete egin zen, eta Foru Aldundiko kideek beren azalpena eman ondoren, lan taldeetako dinamikarekin abiarazi zuten saioa. Horrela, herritar bakoitzak aukeratu zuen eztabaidagaia: fiskalitatea eta aurrekontuak alde batetik, eta gizarte politikak bestetik.
Martin Garitanok, Foru Aldundiak dituen eskumenen artetik nabarmenenak bi hauek direla azpimarratu zuen: "Gaur egun kezka nagusietako bat da krisiari aurre egiteko bideak bilatzearena, eta era berean, gizarte politikek ere gero eta garrantzia handiagoa dute, gero eta urte gehiagoz bizitzen garelako. Beraz, fiskalitate egokia behar dugu, garapen ekonomikoaz gizarte politika ona aurrera eramateko".