Baqueira Bereten (Katalunia) lau egunez Espainiako iraupen eski txapelketan lehiatu ondoren, Ioseba eta Imanol Rojo anaiak urrezko bi domina lortuta itzuli dira Tolosara. Bi dominak erreleboka lortu dituzte.
Ostegunean, team sprint modalitatean, bi anaiek osatutako bikoteak irabazi zuen. Herenegun, errelebo mistoetan parte hartu zuten, eta hor ere lehen postua eskuratu zuten bi anaiek eta Maialen Lopez irundarrak osatutako hirukoteak. Ostiralean eta larunbatean banakako probak izan ziren, eta horietan ez zuten dominarik lortu, gutxigatik. Klasiko eran, Iosebak laugarren amaitu zuen eta Imanolek hamargarren postuan. Skating eran, Imanolek laugarren postua eskuratu zuen eta Ioseba, berriz, 15. iritsi zen.
Imanol Rojok azaldu duenez, «gustura» daude lortutako bi dominekin, baina norbanako probekin ez dira pozik geratu: «Dominaren bat lortzea espero genuen, baina ni birus batekin nabil azken hamabost egunetan eta ezin izan naiz nahi bezala aritu. Ioseba ere ez da forma onenean iritsi txapelketara». Imanol pozik dago, norbanako probetan lehen postuan amaitu dutenen kontra irabazi dutelako errelebo mistoan: «Euskadiko selekzioa ordezkatu dugu, eta kataluniarrak izan ditugu aurkari zuzenak. Parean aritu ginen, baina, azkenean, 19 segundorengatik irabazi genuen proba».