Amaiur koalizioak Tolosako herria zoriondu du eta, bide batez, bere "esker ona" adierazi dio igandeko hauteskundeetan "gure proiektu politikoari eman dion babes zabalagatik". Kanpainan "behin eta berriz" esan dutenez, "hauek ez dira gure instituzioak, baina gure herriak bizi duen une historiko honetan, ezkerreko abertzaleon ahotsa bertan egotea beharrezkotzat jotzen dugu". Koalizioak gaineratu duenez, "Tolosako herriak oro har, ozen adierazi du bakearen, normalizazioaren eta erabakitzeko eskubidearen aldeko nahia eta Amaiur nahi horren ahotsa izango da Madrilen". Horretarako, Aieteko Adierazpena eta Gernikako Akordioa izango dituzte bere jardunaren gidalerroak eta "behin betiko konponbidea" ekarriko lukeen aldaketa politikoa da beraien "etengabeko aldarria".