Nafarroako Orkoien herriko Kirol Sport taldearen aurka jokatu zuen iragan larunbatean Laskorain areto futbol taldeak, eta kontrako emaitzarekin itzuli ziren horitxoak etxera, 4-1ekoarekin, hain zuzen ere.
Sailkapeneko goikaldeko postuetan kokaturik dagoen Kirol Sport taldeak nagusitasunez menperatu zuen Tolosako taldea. 1-0 aurreratu zen etxeko taldea lehenengo zatian. Bigarrenean, jokuak ez zuen aldaketa handiegirik erakutsi, eta aldea handituz joan zen pixkanaka. Hala, markagailuak 3-0ekoa adierazten zuenean, eta partidaren amaierarako 4 minutu baino falta ez zirenean, atezain jokalariaren taktika jarri zuen martxan Laskorainek. Honek berehalako eragina izan zuen, 3-1ekoa egin ahal izan baitzuten. Tolosarrek aukera gehiago izan zituzten, baina ez zen bat bera ere golean amaitu. Aldiz, etxekoek laugarrena egitea lortu zuten. Azkenean, 4-1ekoarekin bukatu zen partida. Erreskadan jasotzen duen bigarren porrota da, baina, oraindik ere leku erosoan mantentzen da sailkapenean.
Asteburu honetan Concepto Egileren aurkako derbia jokatuko dute horitxoek.