Pasa den astean liderraren etxean amore eman eta gero, partida zaila zuen Laskorainek jardunaldi honetan. Sailkapenean lau puntura eta laugarren postuan kokatuta, ligaren azken txanpa honetan aparra bezala gora doan taldea da Meatzari eta hiru puntuei etxean eusteko gogotik egin behar izan zuten lan ikastolakoek.
40 minutuetan iraungo zuen erritmo biziak. 4-3 irabazi zuten horitxoek eta azken unera arte ez zen erabaki partida. Tolosarrek sartzen zuten gol bakoitzeko, beste batekin erantzuten zuten aurkariek. Iturraldek sartu zuen garaipenaren gola. Partida amaitzeko geratzen zen minutu apurrean aurkariak egindako erasoaldiei txukun eutsi zien Laskorainek.