Lehen aldiz antolatu dute artisau azoka Orendainen. Igande honetan izango da, goizean zehar, artisau produktuak eskuratzeko aukera. 10:00etatik 14:00etara izango dira postuak zabalik.
Izpiliku xaboi naturalak egiten dituztenak orendaindarrak dira, Amaia Garmendia eta Naiara Lizarribar ama-alabak. Udaletik esan dute haiei otu zitzaiela herrian azoka egitearen ideia. Postua jarriko dute beraien produktuekin goizean, eta, horrez gain, xaboi tailerra eskainiko dute, 10:00etatik 11:00etara, haurrentzat. Parte hartu nahi duenak bertara agertu beharko du, eta Izpilikuko kideek jarriko dute tailerrerako beharrezkoa izango duten materiala.
Horrez gain, beste bi postu izango dira herritarren eskutik: batetik, Zelaieta gaztak erosteko aukera izango da, eta, bestetik, herrian bizi den bikote batek belarrekin egindako produktuak jarriko ditu salgai.
Denera 29 postu izango dira. «Ez genuen uste horrelako arrakasta izango zuenik», esan dute antolatzaileek. Hainbeste posturekin, askotariko produktuak erosteko aukera izango da: altzariak, bitxiak, eztia, gazta, xaboia, zeramika, poltsak, motxilak, euskal jantziak... Kilometroetako postu bat ere jarriko dute, aurtengo ediziorako prestatuta dituzten material eta arropak saltzeko.
Orendaingo Eltxoak Elkarteak, bere aldetik, postua jarriko du, bertaratzen direnentzat janaria eta edaria eskainiz: «Proposamena egin diegu postu bat jarri eta salda, haragi egosia edota txorizoa eskaini dezaten, horrela, elkartearentzat ere sarrera bat izan daitekeelako».
Eguraldiak lagunduko balu plazan egin nahiko lukete, baina bestela frontoian antolatuko dute guztia. Lehen edizioa ondo aterako balitz, baloratu egingo dute datorren urtean berriro antolatzeko aukera.