Batekin nahikoa ez eta, bi suziri bota dituzte, goizean, orendaindarrek. Arratsaldean ere lehertuko da festa, udaletxeko balkoitik botako dutelako aurtengo jaiei hasiera ofiziala emango dien txupina. Gaurkoa, hala ere, haurren eguna ospatzen ari dira bertan, eta goizean, etxeko txikienek, gozokiak jan eta futbolean jokatzeko aukera izan dute.
Arratsalderako, berriz, beste hainbat jarduera antolatu dituzte herritarrek. Izan ere, haurrek, bai jolaserako, baita ipuinak entzuteko ere tartea izango dute. Helduen txanda, iluntzean iritsiko da, txupinazoaren ostean, sabela betetzeko asmoz egingo duten saiheski jatean. Baina, afal orduan hartutako indarrek, ez diete asko iraungo orendaindarrei, jarraian ospatuko den III. Binakako Lokotx Bilketa herrikoian xahutu beharko dituztelako. Gaua, trikitilariena izango da; Laja, Larrañaga eta Lutxurdio arituko dira kantuan, herria erromeria doinuez alaitzen. Ikusi hemen gaurko egitaraua.
