Birritan jaurtiko da suziria Orendainen; lehenik, haurrek botako dute, goizean; arratsaldez, aldiz, txupinazo ofiziala izango da.
Aurrenengo leherketaren ondoren, 3x3 areto futbol txapelketa jokatuko da, eta bazkalostean, jolasteko unea izango da. 21:00etan saiheski jatea egingo dute orendaindarrek; jandakoak botako dituzte ordea, ondorengo lokotx bilketan. Amaitzeko, Huntz taldearen kontzertua izango da.
Eztarria sagardoz bustitzen hasiko dute Umeen Eguna herritarrek; geroxeago, herri kirolak izango dira, lehenik, haurren eskutik, eta segidan, helduagoak ariko dira. Esku-huskako partidak ere ikusteko izango dute paradarik herritarrek, Saralegi eta Garmendia, Urretabizkaia eta Telletxea, norgehiagoka antolatu baitute, 22:30ean. Trikiti soinuekin emango diote bide azken egunari.
Apurrak ez dira nolanahikoak izango. Goizetik hasita, XXIV. Txirrindulari proba ospatuko da, 12:00etan. Herri bazkaria izango da lasterketa bukatu bezain pronto, Eltxo elkartean. 16:30ean, aldiz, toka txapelketa izango da batetik, eta zirku tailerra puzgarriekin, beste alde batetik. Pilak kargatu beharrean eta, tortilla patata lehiaketa izango da iluntzean, Erramun Martikorena eta Txintxarri abesbatzaren kontzertuaren aurretik.
Gauerdian, eltxoek harriari buelta emango diote; eta festak agurtzeko, Unsain taldearen kontzertua izango da.
ANDRA MARI JAIAK
ABUZTUAK 14, IGANDEA
11:00. Haurren txupinazoa, eta 3x3 areto futbol txapelketa.
Ondoren. Bazkaria.
16:00. Ume jolasak.
20:00. Txupinazoa.
21:00. Saiheski jatea (5 euro).
Ondoren. II. Binakako lokotx bilketa herrikoia.
23:30. Huntza taldearen kontzertua.
ABUZTUAK 15, ASTELEHENA
11:15. Meza.
12:30. Sagardo dastaketa.
18:00. Herriko umeen herri kirol erakustaldia.
Jarraian. Herriko herri kirol taldearen erakustaldia.
20:00. Zahagi ardoa.
22:30. Pilota partidak: Saralegi - Garmendia vs. Urretabizkaia - Telletxea.
Ondoren. Herriko trikitilarien emanaldia.
ABUZTUAK 16, ASTEARTEA
12:00. XXIV. Txirrindulari proba.
14:30. Herri bazkaria Eltxo elkartean.
16:30. Herriko XIV. Toka txapelketa.
16:30. Zirku tailerra Zirika Zirkusen eskutik, eta puzgarriak.
20:30. Patata tortilla lehiaketa.
22:30. Erramun Martikorena eta Txintxarri Abesbatza.
00:00. Eltxoek harriari buelta ematea.
Segidan. Unsain taldearen kontzertua.