Erik Jakak eta Iker Salaberriak Lau eta Erdiko Txapelketako ligaxkaren partida jokatu behar zuten bihar Altsasun, baina Salaberriak uko egin dio partidari eta, beraz, Jakak lehen puntua eskuratzeaz gain, 22-0ko markagailuarekin irabazita izango du neurketa hori. Salaberriak minarekin amaitu zuen Ezkurdiaren aurkako lehen jardunaldiko partida, eta ez du eskua guztiz berreskuratu. Hori horrela, Goizuetakoak ez du aukerarik izango finalerdietara igarotzeko.
Jaka oso adi egongo da bere multzoko beste neurketari, Ezkurdiaren eta Peio Etxeberriaren artekoa. Jakak lehen jardunaldian Etxeberriaren aurka galdu zuen, 9-22, eta hirugarrengoan Ezkurdia izango du aurkari.