Martxoaren 8ra begira herritarren sormena dantzan jarri nahi du, beste urte batez, Kalamatrike euskara eta kultura taldeak. Iaz egin bezala, aurten ere herritarrei ipuinak, olerkiak, bertsoak, ilustrazioak edota kontakizunak idazteko eskatu diete, berdintasuna, irakurzaletasuna eta sormena bultzatzeko asmoz. Eta horrela, Emakumearen Nazioarteko Egunerako bilduma bat osatu nahi dute jasotzen dituzten artelanekin. Otsailaren 27rako bidali beharko dira lanak kalamatrike@gmail.com helbidera, edo, bestela, liburutegian aurkeztu beharko dira.
Herritar bakoitzak lan bakar bat aurkezteko aukera izango du, eta testua den kasuetan gehienez 6.000 karaktere izan beharko ditu. Ilustrazioa denetan, orrialde bateko tamainan egiteko eskatu dute, hau da, A4 neurrian. Lan guztiei egilearen izen-abizenak eta lanaren izenburua jarri beharko zaie. Kalamatrikek herritarrei parte hartzeko gonbidapena egin die, "begiak itxi, buruari eragin eta adimena ireki" dezaten.