Aritz Ganboa Arruazuko artzainaren erronka abiapuntu duen Bideak dokumentala ikusteko aukera izango da larunbatean Lizartzan. Iazko urrian egindako kirol erronka bat bildu du filmean: bere arbasoen herriak, Arruazu eta Izaba, korrika lotu zituen mendiz, berekin Idiazabal gazta bat zeramala. 170 kilometro guztira. Helmugan Erronkariko gazta batekin egin zuen trukea. Helburua landa eremua eta artzaintza balioan jartzea zen.
Dokumental hori ikusgai izango da, larunbatean, 18:30ean, zimitorioan. Kalamatrike taldeak eta Lizartzako Udalak antolatu dute, eta Aritz Ganboa bera dokumentala aurkezten izango da. Ondoren, berarekin solasean aritzeko tartea ere izango da. Aurrez izena eman beharko da udaletxean bertan edo 673 905 685 telefonora deituta. 100 lagunentzako edukiera mugatu dute.