Seigarren edizioa berezia izan da Mendi Mendi Etxera mendi ibilaldian parte hartu dutenentzat. Aurten, pandemia egoeragatik, ezin izan dute urtero prestatu ohi duten ibilbidea jarraitu, baina, ez dira besoak gurutzatuta geratu eta beste modu batera antolatu dute. Bakoitzak gogoko duen mendi, gailur, txokoren batera egin dute ibilaldia eta handik argazkiak bidali dizkiete antolatzaileei izen emate garaian jasotako zapiak soinean zituztela.
Jasotako irudi guzti horiekin bideo bat osatu dute antolatzaileek eta eskerrak eman nahi dizkiete izena eman duten 300 lagunei, "erantzun ederra eman dutelako". Esan dutenez, "elkartasunaz ez duela etenik erakutsi dugu eta, beste behin ere, norberaren konpromisotik gauzak egin daitezkeela argi geratu da".