Plazan amaitu dute kalejira, eta bertan, Lizartzako Inauteri Dantzen emanaldia izan da. Urtero, talde bat gonbidatzen du herriko dantza taldeak, eta aurten, Astigarragako Astigar Dantza Taldea izan da gonbidatua. 14:00etan, berriz, Inauteri bazkariari ekin diote, plazan; txaranga ari da otordua alaitzen. Ondoren, zozketa desberdinak egingo dituzte, eta arratsaldean, herri kirol erakustaldia izango da, Karmele Gisasolaren (Zelai III), Jon Gisasolaren (Zelai IV) eta Mikel Agirreren eskutik. Amaitzeko, ijitoa erreko dute plazan, inauteriei agur esateko.