Lizartzako haurrek apaindutako hesia jarri dute gaur, eskolaren parean. Lau saio izan dituzte Naiara Delgado Perezekin eta oso esperientzia aberasgarria izan dela esan du arte tailerreko irakasleak. "Jolas baten bitartez margotuko genuena diseinatu genuen, irudimena lantzeko, eta gero egurrak prestatu genituen. Kolore biziekin margotu genituen egurrak eta irudia gehitu genien, gero. Oso hesi bizia geratu da, kolore askorekin", esan du.
Udalak gonbidatuta eskaini du arte tailerra Delgado Perezek eta 20 bat haurrek hartu dute parte, heldu batzuen laguntzarekin. Hesia bera auzolanean margotzeaz gain, jarri ere modu berean egin dute.