Atzo Lizartzako udaletxean ahotsak.com proiektuak, Lizartzan jasotako ahotsen aurkezpena egin zuten. Proiektu honen helburu nagusia Euskal Herriko ahozko ondarea eta herri hizkerak katalogatu eta hedatzea da; hau da, gure herrietako adineko jendea elkarrizketatu eta euren euskara eta bizipenak jasotzea eta herritarren artean zabaltzea.
Lizartzan atzo egin zuten aurkezpenean, Lizartzako aiton-amonen bizipenak jaso dituen bideoa ikusi ahal izan zen. Lizartzako ahotsak 2011ean hasi zen 13 aiton-amonak elkarrizketatzen eta grabatzen, eta guzti horren emaitza da atzo aurkeztu zena.
Ondoren, bakoitzari bere elkarrizketa eta aurkezpena biltzen dituen CDa oparitu zioten. Udalak bere "esker ona" eta "mirespena" adierazteko meriendatxo bat prestatu zien protagonistei, eta guztiak elkarrekin kontu kontari aritu ziren. Aipatutako grabaketa guztiak ahotsak.com web orrian ikusgai daude.