Larunbatean motozale bat hil zen GI-2135 errepidean Lizartzarako noranzkoan, Leaburu-Txaraman. Istripua moto bat eta auto baten artean izan zen, eta moto gidaria, gizonezkoa, bertan hil zen. Bada, Segurtasun sailetik esan dutenez, istripua gertatu eta ordu batzuetara istripuan inplikatutako auto gidaria atxilotu zuten. Bide-segurtasunaren aurkako delitu bat eta zuhurtziagabekeria larriko giza hilketa bat leporatu dizkiote 49 urteko gizonezkoari. Halaber, alkohola eta drogak detektatzeko probetan positibo eman zuela jakinarazi dute.
Atxilotuak zauri arinak zituen eta Tolosako Asuncion Klinikan artatu zuten; ondoren poliziaren esku gelditu zen diligentziekin jarraitzeko. Horiek amaitzean Tolosako Goardiako Epaitegiaren esku utzi dute.
