Euskal Pentatloi Sariaren banakako bi final jokatuko dira, larunbatean, Azpeitiko zezen plazan, 22:00etan hasita. Batetik, Emakumezkoen II. Euskal Pentatloi Saria izango da jokoan, eta bertan hiru kirolari ariko dira: Lucia Orbe, Karmele Gisasola eta Nerea Arruti.
Bestetik, Gizonezkoen V. Euskal Pentatloi Sarian sei kirolari ariko dira: Xabier Zaldua, Izeta VI.a, Julen Gabirondo, Aitzol Atutxa, Zelai IV.a eta Joseba Otaegi. Sarrerak Tolosako Kantabriko tabernan eta Azpeitiko Mendizabal taberna-erretegian daude salgai, 25 euroan. Egunean bertan, 20:00etan, takilak zabalduko dituzte eta zezen plazako ateak 21:00etan irekiko dituzte.
Egin beharreko lana, emakumeak:
- Harria, 15 jasoaldi
- Giza proba plaza bat
- Aizkora, bi 45 ontzako
- Txingak lau plaza
- Korrika kilometro eta erdi
Egin beharreko lana, gizonezkoak
- Harria, 25 jasoaldi
- Giza proba bi plaza
- Aizkora 3 kanaerdiko
- Txingak sei plaza
- Korrika 3 kilometro
