Larraulgo kultur bizitzak aurrerapauso garrantzitsu bat eman du gaur, arratsaldean inauguratu da eta bertako liburutegi berritua. Lehen, astean behin bakarrik egoten zen irekita; orain, berriz, astelehenetik ostiralera, arratsaldero, 16:30etik 19:30era egongo da udaletxeko azken solairuan kokatuta dagoen gunea bisitatzeko aukera. Horrela, zerbitzu hobe bat ematearekin batera, jendeak bertara joateko zuen ohitura aldatu eta erabiltzaileak areagotzea espero dute.
Liburutegira bertaratutakoek, azken lau hilabeteetan egindako aldaketak ikusi ahal izan dituzte. Eraberritze lan horien artean, haur, gaztetxo nahiz helduentzako egokitutako guneak jarri dituzte, hala nola, Txiki Txokoa deiturikoa, KZ Gunea edota helduentzako sofekin osatutakoa. Gaur arratsaldeko ekitaldiaren aurretik, zenbait herritar, guztia txukun jartzen eta liburuak gaika sailkatzen aritu dira.
Ekitaldia, haurrak etortzearekin batera hasi da, Txiki Txokoa gunean. Bertara, txistua joz heldu da Ibai Esoain bertsolaria, eta ondoren, hitz batetik abiatuta, ipuin ezberdinak kontatu dizkiete bertan zeuden herritarrei, istorioarekin lotura zuten kantu herrikoiak tartekatuz. Azkenik, ekitaldiari amaiera emateko, pintxoak dastatzeko aukera izan da liburutegian bertan.