Eguraldiak lagundu ez arren, 188 lasterkari irten dira 10:30ean Larrauldik Herniora bidean. Puntan gurutzea ukitu eta Larraulgo plazako helmuga zeharkatzen lehena Hassan Aitchaou billabonatarra izan da, 1:16:29ko denborarekin. Mendi lasterketa honetako errekorra ere berak ezarri zuen, baina zazpi minutugatik ezin izan du hautsi. Nahiko jarraian helmugaratu da bigarren lasterkaria ere; Iñaki Olano altzotarra izan da 1:17:03ko denborarekin. Podiuma Aitor Manterolarekin osatu dute; 1:22:12an zeharkatu du helmugako marra. Emakumeetan berriz, Leire Baraibarrek lortu du lehenengo postua. Lehen aldiz hartu du parte lasterketa horretan, eta 1:39:06ko denboran egitea lortu du. Bigarren, Rosa Uribe iritsi da 1:43:11ko denboran, eta minutu bat beranduago heldu da Onintza Mitxelena, 1:44:54ko denboran.
Zortzigarren edizio honetan, Rosa Talavera atleta hernaniarra omentzeko tartea hartu dute lasterketa hasi aurretik. Parte hartzaile guztiak animatu ditu, eta bera izan da lasterketa abiarazi duena.