«Jokatu ahala, geroz eta erosoago sentitzen naiz»

Errege egun bezperan, urtarrilaren 5ean, opari ederra izan zuen Intza Egiguren (2005, Anoeta) Realeko jokalariak: lehen taldearekin debutatu zuen Bartzelonaren aurkako partidan. Geroztik, partida bakarrean izan ezik, denetan izan ditu minutuak anoetarrak. Zelaian egindako lan onaren ordaina, hilabete hasieran jaso du: 2028ra arte berritu du kontratua talde txuri-urdinarekin.

Nola bizitu dituzu azken hilabeteak?

Denboraldi hasieratik lehen taldeko dinamikan nengoen arren, deialdian lehenengo aldiz urtarrilean sartu nintzen, Bartzelonaren aurkako partidan. Hortxe debutatu nuen, eta hortik aurrera, partida dezente jokatu ditut lehen taldearekin. Kontratua berritzearen kontua ere orain dela bi asteko kontua da, eta oso gustura nago.

Bartzelonaren aurkako partidan deialdian zeundela ikusita, zer pasatu zitzaizun burutik? Jokatuko dut, ez dut jokatuko...

Gabonetatik bueltan, hiru egun eduki genituen partida prestatzeko, eta hor jada ikusten hasten zara deialdian sartuko zaren ala ez. Esperantza banuen deialdian sartzeko, pare bat taldekidek min hartu zutelako, eta horrek ere ateak gehiago irekitzen zizkidan. Partida egunean urduritasun pixka bat izan nuen, eta bai, jokatzeko esperantza beti duzu.

Estreinako partida lehen mailan munduko talde onenetariko baten aurka.

Bai, gainera, Zubietan, Bartzelonaren aurka... Ziur aski munduko talde onena da Bartzelona. Emaitza aldetik ez zen gure partidarik onena izan, ezta joko aldetik ere, baina debuta debuta da, eta horrekin geratzen naiz.

Debutaren ondoren, nola ikusi duzu zure burua azken partidetan?

Uste dut geroz eta erosoago sentitzen naizela partidak jokatu ahala. Hala ere, entrenamenduei garrantzi handia ematen diegu, lehen mailako erritmora egokitzeko aukera ezin hobea delako. Hori aprobetxatu eta jokatzeko aukera dudanean ahalik eta ondoen egiten saiatu nahi dut.

Kontratua ere berritu duzu. Aurretik hitz eginda zegoen edo bat-batean iritsi da?

Hilabete batzuetako kontua da. Kontratua berritzeko hitz egiten ari ginen, eta nik argi nuen hemen jarraitu nahi nuela. Zalantza gutxi izan nituen alde horretatik.

Denboraldi honetan, nola ikusten duzu taldea?

Txapeldunen Ligako postuetatik oso gertu gaude. Orain atsedenaldia izan dugu selekzioko partidak izan direlako. Igande honetan Sevillaren aurka jokatuko dugu etxean. Partidaz partida joan behar dugu, eta ikusiko dugu nora iristeko gai garen.

Eskualdeko lau jokalari lehen taldean, laurak Tolosan aritutakoak. Bada marka.

Bai, asko gara. Gainera, uste dut lehen taldetik jokalari gehien gaudenak oraintxe bertan Tolosatik atera garela. Harrobian ere badaude Tolosan aritutako jokalari gehiago, eta ea iristen diren.