Eguberrietako emanaldien ondoren, egun batzuetako atsedena hartuko dute bi abesbatzek urteari begira dituzten proiektuei buruz hitz egiteko. Txintxarri Abesbatza Kultur Elkarteak urteko Batzar Nagusia egingo du urtarrilaren 10ean, osteguna, kultur etxean. Gaueko bederatzietan izango da batzarra.
Amaitu berri dugun urtearen errepasoa eta balorazioa egingo dute lehendabizi. Bi abesbatzek, Txintxarri Txikik eta Txintxarrik, egin dituzten ekintzak eta diru kontuak aztertu eta onartuko dira. Bi koruek urte honetarako dituzten aurreikuspenak ere aurkeztuko dira batzar nagusian.
Elkarteko Zuzendaritza Batzordearen zati bat ere berritu egingo da batzar nagusi horretan.
Elkarteko bazkide guztiei batzar horretara joateko dei egiten zaie, eta bide batez, elkarteko bazkide egin nahi izanez gero, koruko kideren batekin harremanetan jarri edota kultur etxeko postontzian eskaera uztea besterik ez da egin behar.
Ez diogu hau kapritxo hutsagatik: lagun gaitzazu . Eduki hau guztia doan ikus dezakezu euskarazko hitzik gabeko Tolosaldea ez dugulako irudikatzen. Atarikide, iragarle eta erakunde askoren laguntzarik gabe ez litzateke posible hori. Gero eta komunitate handiagoa sortu, orduan eta sendoagoa izango da Ataria: zurekin, zuekin. Ez utzi biharko gaur egin dezakezun hori: egin zaitez Atarikide!
EGIN ATARIKIDE!
