Dueñasko Castilla Vieja abesbatzak gonbidatuta doa bertara Alegiako abesbatza. Iazko urrian izan zen Palentziako abesbatza Alegian, eta orain Txintxarri abesbatzak itzuliko dio bisita. Abesbatzen topaketa horretan Coruñako Laxe herriko Atalaia abesbatzak ere parte hartuko du.
Sei obra eskainiko ditu Txintxarri abesbatzak. Euskal abesti batzuk abestuko dituzte: “Boga boga” eta “Herribera” abesti herrikoiak, eta Josu Elberdin Pasaiako konpositorearen “Kantauri” izeneko doinua. Oso estilo desberdineko doinuak ere abestuko dituzte Dueñasko elizan. Esate baterako, John Rutter musikagile britainiarraren “I will sing with the spirit” abesti dinamikoa eskainiko dute. Iazko azaroan hil zen Leonard Cohen kantari kanadarraren abesti ezagun bat ere abestuko dute, “Hallelujah” alegia. Antonio Machado poeta sevillarraren “Caminante no hay camino” poeman oinarritutako “Cantares” abestia ere eskainiko dute; Joan Manuel Serrat abeslari kataluniarrak egin zuen poema horrentzako musika duela zenbait urte.
Garbiñe Orbegozoren zuzendaritzapean abestuko dute alegiarrek eta Mariaje Rekondok lagunduko die pianoarekin zenbait kantutan.
Emanaldiaren amaieran, hiru abesbatzek batera abestuko dute. Giuseppe Verdi musikagile italiarraren “Nabucco” operako “Va pensiero” abesti ezaguna eskainiko dute.
Palentzia eta Leongo bazterrak ezagutzen
Lau egun egingo dituzte Palentziako eta Leongo bazterrak bisitatzen. Larunbatean Dueñas herriko Trapa txokolategia eta upategi bat bisitatuko dituzte. Horrez gain, herriaren historia azalduko diete.
Igandean, Palentzia hiriburuko eta Fromistako arte erromanikoa ezagutuko dute. Astelehena eta asteartea Leonen emango dituzte alegiarrrek.