Bi abesbatzek ostegunetan egingo dituzte entseguak herriko kultur etxeko areto nagusian, Garbiñe Orbegozoren gidaritzapean. Taldeko gazteenek 19:30etatik 20:30etara entseatuko dute. Helduek, berriz, 21:00etatik 22:30etara.
Urriaren 15ean ospatuko dute aurten Txintxarri Eguna eta bi abesbatzak egun horretarako doinuak prestatzen arituko dira datozen asteetan. Egun horretan Palentziako Dueñas herriko Castilla Vieja abesbatzaren bisita jasoko dute Alegiako abeslariek eta merezitako ongi-etorria prestatuko diete Gaztelakoei.
Txintxarri abesbatzak animatu nahi ditu alegiarrak eta Alegiatik kanpoko herritarrak koruan izena ematera. Interesa izanez gero, kultur etxean utzi behar dira harremanetan jartzeko datuak edota bestela abesbatzako norbaitekin kontatuan jarri behar da.
Txintxarri Txiki abesbatzaren kasuan adin tartea zabaldu egin du abesbatzak. Hortaz, zazpi urtetik hamasei urte bitarteko haur eta gazteek abestu ahal izango dute koruan, hau da, DBH2 mailan ari direnetatik hasi eta DBH 4an ari diren ikasleetaraino.