Arrazakeriaren aurkako Nazioarteko Egunarekin bat eginda, emanaldi berezia egin zuten igandean Alegian kultur etxean. Euskaldunen eta musulmanen kultura eta musika eskaini zituzten, haurren ahotsak elkartuta. Herri eta kultura desberdinen arteko ahaidetasuna oinarri izan zuen emanaldiak. Aretoa jendez lepo beteta egon zen eta gustura entzun zituzten gaztetxoen doinuak.
Alegiako Txintxarri Txiki abesbatzak, Tolosako Hodei Truk Hirukide abesbatzak, Hodei Truk abesbatzak eta Tolosako Lita Arafu elkarteko haurrek parte hartu zuten, musikarien laguntzarekin. Aitor Iraola aritu zen pianoan, Itziar Lujanbio oboearekin eta Jamal perkusioan.
Besteak beste, euskaraz eta arabieraz kantatu zuten haurrek. Emanaldi horretan David Azurza Tolosako musikagileak eginiko bi obra estreinatu ziren. Emanaldiari amaieran talde guztiek batera abestu zuten.