Martxoaren 21a Arrazakeriaren aurkako Nazioarteko Eguna dela eta, musika emanaldi bat eskainiko dute martxoaren 23an Alegiako kultur etxeko areto nagusian, arratsaldeko seietan. Euskaldunen eta musulmanen kultura eta musikak elkartzea da emanaldi honen helburua, bi kulturen integrazioaren erakustaldi bat eskaintzea. Eta horretarako, haur eta gazteak izango dira protagonista.
Tolosaldean martxo honetan egiten ari diren aniztasunaren aldeko eta diskriminazioaren aurkako jardunaldien barruan kokatuta dago emanaldi hori.
Martxoaren 23an emanaldia eskainiko dute Alegiako Txintxarri Txiki abesbatzak, Tolosako Hodei Truk Hirukide abesbatzak, Hodei Truk abesbatzak eta Tolosako Lita Arafu elkarteko haurrek. Musikarien laguntza izango dute abeslariek: Aitor Iraola arituko da pianoan eta Itziar Lujanbiok joko du oboea.
Abesbatzek hainbat euskal kantu herrikoi kantatuko dituzte: Andre Madalen, Nere aitak amari, Xoxuarena edota Furra furra. Tolosako Lita Arafu elkarteko haurrek, berriz, hainbat abesti abestuko dituzte arabieraz eta ipuinak ere irakurriko dituzte.
Emanaldi horretan, David Azurza Tolosako musikagileak eginiko bi obra estreinatuko dira; Magrebeko haur kantu herrikoiak dira eta Azurzak moldatu ditu: Algeriako “Pluf tizen tizen” eta “Minga turi”. Oboearen eta perkusioaren laguntzarekin eskainiko dituzte. Ondoren, Tunisiako obra bat abestuko dute, “Param param”.
Eta emanaldiari amaiera emateko, talde guztiek batera abestuko dute: “Aldapeko sagarraren” doinuaren moldaketa bat estreinatuko da, eta “Kanbon palangak pagoz”.