Izan zen Tolosako Alde Zaharrean 38 sagardotegi zeuden garai bat. Gerora, gune horiek taberna edo komertzio bilakatu dira, edo desagertzera jo dute. Baina, datorren larunbata izango da antzinako giro horretara itzultzeko eguna, bisita gidatu antzeztuekin.
16:00etan euskaraz eta 18:00etan gazteleraz, ordu eta erdi inguruko bisitaz gozatu ahal izango dute parte hartzaileek. Azalpen historikoak Tolosaldea Tour turismo bulegoko kideek eskainiko dituzte, eta Intujaiko aktoreek hainbat eszena interpretatuko dituzte, May Gorostiagak ATARIA irratian azaldu duenez.
