Biomasa ez da alternatiba bakarra gure eskualdean erregai fosilak baztertzeko, baina subiranotasun energetikoaren bidean, beste energia berriztagarriekin batera, giltzarria da eta ez da nahikoa etekin ateratzen gure basoetatik.
Eskualdean erabiltzen den energia iturrietatik % 0,3 besterik ez du betetzen biomasak, energia berriztagarrien %17 suposatzen duena (hidroelektrikoaren ondoren %80). Eta gehiago erabil daiteke: eskualdeko baso publikoek Tolosaldeko eraikin publikoetan kontsumitzen den biomasa emateko ahalmena dute eta, HAZI Fundazioaren ikerketa zabalaren arabera.
Bertako baliabide berriztagarriak aztertzea eta balioan jartzea da PIZTU Tolosaldea Energia planaren helburu nagusietako bat. BIOMASA tartean. Eskualdeko basoetan grabatutako spotak biomasaren aukera energetikoa plazaratzen du, gutxienez hausnartzera gonbidatzen du eta etorkizuneko basogintzaren oinarriak eta bideorria marraztera ere bideratzen du.
Eskualdeko biomasak alor energetikoan eta ekonomikoan jokatu dezakeen papera antzemateko eta eragile guztien artean biomasaren estrategiaren bide orria zehazteko helburuarekin egin dugu txosten hau eta 2018an zehar egurraren katean aritzen diren agenteekin egindako elkarrizketa sortak honako ondorioak ekarri ditu:
- Eskaera handitzeko Udalek paper dinamizatzailea izan behar dute; eskura dituzten hainbat tresnen bitartez: legeak, zergak edo lizitazio publikoak.
- Kalitatezko produktua erabiltzea bultzatu behar da, prezio aldetik lehiakorra, km 0 edo bertakoa dena eta aztarna ekologiko baxuenarekin.
- Baso-publikoak bere osotasunean balioan jarri behar dira, ez soilik bioerregaien ikuspegitik, balio handiagoa duten produktuak baitaude.
- Basoek kudeaketa bat eskatzen dute.
- Biomasako proiektuek eskatzen duten inbertsio handiei aurre egiteko agente publiko eta pribatuen arteko elkarlana erraztu behar da.
