Gainera, adin ezberdinekoak biltzen dira Lizartzako Ostutan eta «hori oso polita» dela zehazten du Marquetek. Baina kontrara, ekonomikoki oso zaila dela ere aitortzen du. Lizartzako Ostatua ia kultur etxe gisara erabiltzen da, eta honela herritarren topagune bihurtu da.
Normalean ostatuetan ezustekoak izaten direla dio Marquetek: «Toki apartatuak izaten dira eta normalean ez duzu jende gehiegirik espero baina ezustekoak ere izaten dira. Honela, prest egotea oso zaila izaten da». Hala ere, Marquetek dio berari «denetarik apurtxo bat prest izatea» gustatzen zaiola.
Proiektuaren atzean bi urte luze eman eta gero, proiektua bera egokitzen joan da. Zailtasunik handienetakoa langileak aurkitzea dela aitortzen du Marquetek, «batez ere asteburuetan». Honela, esperientzia bere horretan «gogorra» izaten ari dela ezin esan gabe utzi du.
Asteartetan jai eguna izaten dute, baina gainontzeko egunetan zabalik izaten da: 10:00etan hasi eta iluntzean itxi bitarte. Astean zehar, 21:00ak bitarte egoten da zabalik, baina asteburuetan beranduago ixten dute.
Bertako produktua da kozinatzen dutena. Askotan, inguruko ekoizleek opariak eramaten dizkiote Miren Josebe Marqueti, eta berak mimoz prestatzen ditu Lizartzako Ostatuko sukaldean. Garaian garaikoa.
Sukalde barrura
Arkume hankak saltsan da gaurko platera eta hori prestatzeari ekingo diogu Errezeten Txokoan. Arkume asko dago herrian bertan, eta honela, errezeta oso aproposa da Lizartzako Ostatuan eskaintzeko.
Miren Josebe Marqueten amak egiten zuen errezeta da gaurkoan prestatuko duguna Errezeten Txokoan: arkume hankak saltsan egingo ditugu.
Lehenik eta behin, arkume hankak baporean jarriko ditugu —4 orduz, 100 graduan—. Ondoren, barazkien txanda izango da. Zartagin batean olio apurtxo bat botako dugu, ez gehiegi, izan ere arkume hankak oso sendoak dira eta. Olio pixka batean porrua, tipula, baratxuria eta perexila jarriko ditugu eta sutan jarriko ditugu. Apurtxo bat eginda dagoenean, cognac-a gehituko diogu. Alkohola ebaporatzen utziko dugu. Hankak gehituko ditugu orduan, salteatzen utziko ditugu, gelatina ateratzen utziz. Jarraian, ardo txuria gehituko diogu. Alkohola askatzen utziko diogu. Eta jarraian ura gehituko diogu. Kasu honetan ez genieke salda gehituko, ur soila baizik. Izan ere, arkume hankek nahiko zapore kontundentea dute, eta urarekin suabeago geratuko dira. Irakiten utziko ditugu. Ikusten dugunean hankak bigun-bigunak daudela, eginda dauden seinalea izango da. Ilarrak orduan, azken momentuan, gehituko dizkiogu. Kasu honetan kongelatutako ilarrak erabili dira, eta denbora nahiko izaten da.
Miren Josebe Marqueten etxean, amak aitari, arrautz-irinetik pasata prestatzen zizkion arkume hankak. Beraz, etxean prestatuz gero, nahi eran egin daiteke; hau da, esplikatu bezala, edo pauso horietaz gain, arkume hanka bakoitza arrautz-irinetik pasata. Lana bikoiztuko litzateke honela.
Marqueten esanetan, gaur egun etxeko jana oso toki gutxitan egoten da; horregatik, bezeroek asko eskertzen dute gaurkoa bezalako errezeta Lizartzako Ostatuan.
OSAGAIAK
- Arkume hankak.
- Porruak.
- Tipula.
- Baratxuria.
- Ilarrak.
- Perrexila.
- Cognac-a.
- Ardo zuria.
- Ura.