Denbora gogotik igaro da DBHko garai haiez geroztik, baina, tamalez, arrantzale eta jauntxoen herriak haien Alde Zaharra inguratzen duen harresiak bezalaxe jarraitzen du: Erdi Aroan gotortuta.
Erdi Aroaren eta gotorlekuen kolore grisa ezabatzen zuten Bufoiek, barrea eraginez. Eta badirudi hondarribitar askorentzat Jaizkibeleko kideak bufoi txikiak direla, herriko festak haiek iraintzeko, haiei barre egiteko eta haiei harriak botatzeko erabiltzen baitituzte, beren gozamen propiorako erabili beharrean.
Baina bufoiek bazituzten pribilegioak, zergatik eta, errege-erreginei haien aisialdia fideltasunez kudeatzeagatik. Hondarribian, alarde tradizional pribatua da jaun eta jabe; bai, jaun bakarrik. Eta, bai, jabe; agintari gehienek haien danborren erritmora dantza egiten baitute. Zalantzan jartzekoa da, beraz, sexismoaren satira honetan bufoiak nortzuk diren.
Udaberri dantza taldeko kideok hunkituta dantza egin genuen, ostiralean, Jaizkibeleko danbor eta txibilituen erritmora, bizkarren iraultzari aurpegia nola ematen dioten ikusiz. Hunkituta jaso genuen haien zapi koloreduna, eta hunkituta entzun genituen urteek ezabatu gabeko testigantza gordinak, afalondoan.
Hori dute helduen kontuek, helduen gaitzek; jolas-garaietara itzultzeko gogoa pizten dute sarri. Nik badakit patiora zein bufoirekin jaitsiko nintzatekeen, haren erritmora dantza egiteko.
Etikako klasea jolas-garaiarekin alderatzen zuten askok. Egia esan, matematiken aldean gozamena zen hontaz edo hartaz aritzea, eta, zer diren kontuak: etikako klasean hausnartu nuen, lehenengoz, jolas-garaian bezalaxe, plastiko beltzaren atzean gordeketan aritzen diren hondarribitarren jarrera.
Erlazionatuak
ATARIA ez da soilik komunikabide bat: komunitate baten ahotsa da, eta urte hauen guztien ondoren, zuen babesa behar dugu, inoiz baino gehiago: ATARIAk behar du Tolosaldea. Horregatik erronka bat daukagu esku artean: gure eskualdeko 28 herrietan hamarna harpidedun berri behar ditugu. Zu falta zara, bazatoz?
EGIN ATARIKIDE!