Arratsaldean, aldiz, han-hemenka zaparrada txikiren bat edo beste izango da, nahiz eta orokorrean oso euri gutxi egitea espero den. Gauean atertu eta ostarteak irekiko dira. Haizea aldakor antzean ibiliko da, baina orokorrean ipar ukitukoa nagusituko da. Tenperaturak behera egingo du, eta gehienez 13-15 gradu harrapatuko ditu.
Bihar hodeiak eta ostarteak tartekatuz hasiko da eguna, eta giroa atsegina eta aprobetxatzeko modukoa izango da, batere euririk gabe. Arratsaldean, aldiz, pixkanaka mendebaldetik barrena hodeiak ugarituko dira, fronte ahul bat iritsiko da eta euritara joko du. Zaparradak ahulak izango dira, eta euri gutxi botako du orokorrean. Goizean haizea hegotik ibiliko da, eta arratsaldean ipar-mendebaldetik. Tenperaturak gora egingo du, 15-17 gradu harrapatuz.