Arratsalde erditik aurrera hodei batzuk agertuko dira, bereziki mendi inguruetan, baina hodei horiek ez dute inolako ondoriorik ekarriko, eta lasai amaituko da eguna. Hego-haizeak zakar edo oso zakar joko du. Tenperaturak gora egingo du, eta termometroak gehienez 18-20 gradura iritsiko dira.
Bihar hodeiak eta ostarteak tartekatuz hasiko da eguna. Erdi eta goi-mailako hodeiak izango dira, eta ez dute inolako ondoriorik ekarriko, ostarte zabalak nagusituz. Arratsaldean zehar pixkanaka barnealdetik barrena hodeiak ugarituko dira, azken orduetan zerua estaliz. Hala ere, ez da euririk espero. Hego-haizearen eraginpean jarraituko dugu, arratsaldean indarra galduz. Tenperaturak koska bat gora egin eta 19-21 gradu harrapatuko ditu.
